മണ്ണില്‍ വിരിഞ്ഞ പൂക്കള്‍ - 15

ടിപ്പുവിന് ആദ്യം മലബാറിലെ പ്രശ്നങ്ങൾ പരിഹരിക്കണമായിരുന്നു...എന്നാൽ മൈസൂർ സേനയുടെ അംഗ ബലത്തിന് മുന്നിൽ  രവിവർമ്മ രാജയുടെ  ചെറുത്ത് നിൽപ്പുകൾക്ക് ആയുസ്സേറെയുണ്ടാവില്ലന്നു നിശ്ചയമുണ്ടായിരുന്നു...ആക്രമണം ശക്തമായതോടെ രാജയും കൂട്ടരും കാടുകളിലേക്ക് പിൻവാങ്ങി ...മുൻ നിശ്ചയിച്ച പ്രകാരം കോയമ്പത്തൂരിൽ നിന്നെത്തിയ കൂടുതൽ സന്നാഹങ്ങളുമായി തെക്കോട്ടേക്ക് തിരിക്കാൻ ടിപ്പു പിന്നെയൊട്ടും താമസിച്ചില്ല..

നമുക്കും മൈസൂറിനും  വേണ്ടത് സമയമായിരുന്നു..രണ്ടു പേർക്കും  ഇല്ലാതിരുന്നതും അത് തന്നെയായിരുന്നു..!

മലബാറിലെ കലാപം നമുക്ക് നല്കിയത് നെടുംകോട്ട ശക്തിപ്പെടുത്താനുള്ള സമയമായിരുന്നു...!

കുഞ്ചുവിന്റെ ആശങ്കകൾ ശരിവയ്ക്കും വിധത്തിൽ...ഈ സമയമത്രയും മദിരാശിയിലെ ഹൊളണ്ട് സായിവ്‌ അനങ്ങിയില്ല...ശ്രീരംഗ പട്ടണം ആക്രമിക്കുന്നതിന് കർശ്ശന നിർദ്ദേശം കൽക്കട്ടയിൽ നിന്നും അയാൾക്ക് ലഭിച്ചിരുന്നുവെന്നാണ് നമുക്ക് അറിയാൻ കഴിഞ്ഞത്...പക്ഷെ അയാൾ  ടിപ്പുവുമായി സന്ധി സംഭാഷണത്തിനു ശ്രമിച്ചു കൊണ്ടിരുന്നു...

കാര്യങ്ങൾ ഇങ്ങനെയൊക്കെ ആയേക്കുമെന്ന് കാലേ കൂട്ടി അറിഞ്ഞതു കൊണ്ട്...സമയോചിതമായി...നമുക്ക് നയതന്ത്ര സമ്മർദ്ദം ചെലുത്താനായി എന്നത് സത്യം തന്നെ...പക്ഷെ!...ഒടുവിൽ ഹോളണ്ടിനെ തൽസ്ഥാനത്ത് നിന്നും മാറ്റിക്കൊണ്ടുള്ള ഉത്തരവ് എത്തിയപ്പോഴേക്കും നെടുങ്കോട്ട തകർന്നിരുന്നു.....

അതെ..!...അയാളുടെ അനാസ്ഥ ടിപ്പുവിന് നല്കിയത്..തിരുവുതാംകൂർ ആക്രമിക്കുവാനുള്ള  സമയം ആയിരുന്നു...!